Khó-kóo ha̍k-tsiá in sī án-tsuánn uì tshuì-iâm-iâm ê uî-bu̍t tang-tiong khì thui-tuàn jîn-luī ê sing-ua̍h bûn-huà?

Thàu-kuè pênn-bīn hiān-siōng ê kì-lo̍k tō ē-tàng tòo-uē tshut uî-tsí ê khong-kan kuan-hē; ùi uî-tsí óo tshut--lâi ê tōng-bu̍t, si̍t-bu̍t ê hun-sik tō ē-tàng thê-kiong hit-tang-tsūn tsū-jiân khuân-kíng ê tsu-sìn; tuì huî-á, tsio̍h-khì, kim-sio̍k, po-lê-phín tsia--ê kiám-giām kiat-kó thang huán-ìng sian-bîn ê kang-gē ki-su̍t kap bōo-i̍k bāng-lōo ; tuì bōng-khut lâng-kut ê gián-kiù, ē-tàng hián-sī lán sian-bîn ê thé-tsit, tsia̍h-si̍t, pēnn-tsìng, kap hong-sio̍k si̍p-kuàn ê tsu-sìn.

Lī-iōng hiān-tāi kho-ha̍k hun-sik ê ki-su̍t, tsiam-tuì óo tshut-lâi ê mi̍h-kiānn sóo tsò ê gián-kiù sī khó-kóo-ha̍k kap li̍k-sú-ha̍k tsú-iàu ê tsha-ī tsi-it. Tī tē 3 tián-sī-thiann ē kā si̍t-tsè tī khó-kóo hiān-tiûnn the̍h tńg--lâi ê kài-tshiûnn, hiān-siōng piau-pún, tōng-bu̍t ê kut-keh kap si̍t-bu̍t ê tsíng-tsí, lâng-kut bīn-bôo-á ho̍k-guân ê bôo-hîng lâi siāu-kài tsia--ê gián-kiù khang-khuè sóo ìng-iōng ê ki-su̍t kap gián-kiù sîng-kó.