Lâm-kho Khó-kóo-kuán sī Tâi-uân thâu-tsi̍t-ê tī Kho-ha̍k hn̂g-khu lāi-té ê khó-kóo tsuan-gia̍p phok-bu̍t-kuán, tsiânn-tsò tsham-kuan Lâm-kho-kuán tián-sī lāi-iông ê tē-it-tsām, tîng-hiān Lâm-kho tē-khu tsū sin-tsio̍h-khì sî-tāi í-lâi 5000 nî li̍k-sú ian-guân kap Lâm-kho uî-tsí tī Tâi-uân khó-kóo gián-kiù ê tiōng-iàu-sìng kap ti̍k-sû-sìng.

 Tián-sī-thiann tsiàu sî-kan sūn-sū tián-tshut 200 guā kiānn Lâm-kho tē-khu 6 tuā khó-kóo bûn-huà, 11 ê tsú-kî-siòng tāi-piáu-sìng ê tin-kuì kóo-bu̍t, ū po̍h kah ná tsuá ê ham-khak-to, kng kah ē tsiò-iánn ê Patu tsio̍h-póo-thâu, phoh-si̍t koh tshù-bī ê lâng-bīn thôo-ang-á, tiau-khik iù-lōo koh tsing-bi̍t ê lo̍k-kak to-pènn kap kut-tâu-á.

Phuè-ha̍p tián-sī-thiann ji̍p-kháu tuā-hîng ê tâu-iánn tōng-uē kap ta̍k-tsióng bûn-huà ê sing-ua̍h bôo-hîng, hōo sú-tsiân bûn-huà m̄-nā sī khò-pún kap muî-thé su-siá ê bûn-jī niā, koh sī ē-tàng kīn-kīn-á khuànn, kám-siū ê tuì-siōng.

Līng-guā, ta̍k-pái tshiúnn-kiù kap óo uî-tsí, long-ē kái-piàn Lâm-kho tē-khu ê tē-hîng, mā-sī tsē-tsē ki-kuan kap kang-tsok jîn-uân tsīn-sim tsīn-li̍k, tsò kah tuā-lia̍p-kuānn sè-lia̍p-kuānn ê sîng-kó, tse 20 guā nî lâi sòo-tsa̍p-pái ê khó-kóo kang-tsok kuè-tîng ê sok-iánn, mā-ē tī tián-sī-thiann tián-hiān tshut--lâi.