Siat-kè lí-liām

Phok-bu̍t-kuán ê guā-hîng khuànn--khí-lâi tshin-tshiūnn hōo to siah tsi̍t kak ê tsio̍h-thâu, tiong-ng koh tshng tsi̍t ki kóng, ì-hâm kái-phuà hun-sik, tshng-so, sî-kan tîng-tha̍h kinn-tînn, tshim-thàm, tsìm-thàu ê khài-liām; kiàn-tio̍k-bu̍t ū kinn-tînn tîng-tha̍h 19 tōo ê tshiâ-kak, it-lâi, sī kuè-khì hong-uī ê ì-siōng, jī-lâi, sī hiān-tāi too-tshī king-uí kuan-hē, kinn-tînn ê ti̍k-suànn tshàng tī guā tshiûnn ê li̍h-phāng lāi, mā tshàng tī phok-bu̍t-kuán ê tián-lám lōo-suànn lāi-té, tsûn-tsāi sî-khong kau-kuah ê tshù-bī-sìng.

Kái-phuà hun-sik khó-kóo

Tsi̍t-to kā tāi-tē phuà--khui, tshiau-tshuē tē-tsàn ta̍k sî-kî sóo lâu--lo̍h-lâi ê kha-jiah, khó-kóo-ha̍k hō-tsò Bûn-huà-tsàn, tshiūnn kiàn-tio̍k siat-kè tiānn khuànn-tio̍h ê “Section”(tuān-bīn-tôo, sī kái-tho̍k kiàn-tio̍k-bu̍t ta̍k khong-kan ê kuan-liân-sìng); kā oo-a̍p-á phuà tsò nn̄g-pîng, thí--khui ê sī bûn-huà-tsàn ê khài-liām, kiàn-tio̍k tshiûnn-piah tîng-hiān tuān-bīn ê hûn-jiah, siōng-ting ta̍k uî-tsí bûn-huà-tsàn tshut-hiān ê siong-tuì kuan-hē, mā ì-hâm Lâm-kho hn̂g-khu king-kuè tsē-tsē-pái ê pá-lâu kap khó-lâu sóo hîng-sîng ê thôo-tsàn kuan-hē.

Tshng-so ê sî-khong

Po-lê-kóng siōng-ting sî-khong ê pōng-khang, tshng-kuè kiàn-tio̍k-bu̍t ê tuān-bīn; po-lê-kóng kā iû-kheh uì tē-bīn sàng kàu kiàn-tio̍k-bu̍t ê siōng-kuân-chàn, gán-tsîng sóo khuànn ê sī ko-sok sut--kuè ê ko-thih, thê-tshénn iû-kheh tsit-má ê sî-khong, koh tsit-ê kiàn-tio̍k-bu̍t ê kuân-tōo siōng-ting tsǹg--kuè-khì 5000 tang tsîng ê suè-gua̍t.

Kau-tsit

Óo khenn, khó-kóo óo-khenn tsûn-tsāi hiān-tāi king-huī kap kuè-khì ê hong-uī, kau-tsit ê bûn-lí bô  tī khí-thâu mā bô tī kiat-sok, sī tsûn-tsāi tī huat-hiān ê kuè-tîng.

Tshim-thàm

Sî-khong pōng-khang ín-tshuā iû-kheh tsìn-ji̍p kiàn-tio̍k-bu̍t ê siōng-kuân-tiám, tsiah ji̍p-khì tián-sī-khu; í sî-kong huê-sok kap khó-kóo khang-khuè tshim-thàm ê khài-liām, siat-kè kiàn-tio̍k tián-sī lōo-suànn, uì kuân kàu kē, uì hiān-tsāi kàu íng-tsá, tuè leh kè-sio̍k thàm-soh ê tsing-sîn.

Tsìm-thàu

Kiàn-tio̍k guā tshiûnn li̍h-phāng ê ì-kíng, sia̍p-lāu kap sî-kan kinn-tînn ê piàn-huà, àm-sī Lâm-kho uî-tsí kap phok-bu̍t-kuán ê kuan-hē, àm-mê kiàn-tio̍k-bu̍t hòng-siā ê kng-iánn, sī tsiânn-tsò ko-thih lú-kheh king-kuè Tâi-lâm Kho-ha̍k hn̂g-khu ê tsi̍t-ê ìn-kì.